منتديات أبناء أم سنيبرة
رواد المنتدى الكرام اذا كنت مسجل ادخل بحسابك حتى تسطيع المشاركة
منتديات أبناء أم سنيبرة
رواد المنتدى الكرام اذا كنت مسجل ادخل بحسابك حتى تسطيع المشاركة
منتديات أبناء أم سنيبرة
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.


منتدى جامع لمناقشة قضايا الحلة الاجتماعية والثقافية والدينية والرياضية وغيرها
 
الرئيسيةأحدث الصورالتسجيلدخول

 

  كلمات أغاني الأستاذ الموسيقار ( محمّد الأمين )

اذهب الى الأسفل 
كاتب الموضوعرسالة
mahmoud mohamed




المساهمات : 13
تاريخ التسجيل : 18/07/2011

 كلمات أغاني الأستاذ الموسيقار ( محمّد الأمين ) Empty
مُساهمةموضوع: كلمات أغاني الأستاذ الموسيقار ( محمّد الأمين )    كلمات أغاني الأستاذ الموسيقار ( محمّد الأمين ) I_icon_minitimeالإثنين يوليو 18, 2011 5:02 pm





**********

وعد النوّار

**********





ياريت من أول وريتنا إنك يمكن تتأخر يوم

كان غايتو اطمنا شويه.. وبحرك يا ليل ما طفنا نجوم

بيقولو الغائب عذره معاه وفي غيابك ياما نشيل اللوم..



مرت لحظات و كمان ساعات طالت وحياتك منتظرين

لو وشوش صوت الريح في الباب يسبقنا الشوق قبل العينين

و نعاين الشارع نلقاهو..تائه في دموع المغلوبين..



العيد الجاب الناس لينا ما جابك .. يعني نسيتنا خلاص

مع انك إنت الخليتنا نغني الحب ذكرى و إخلاص

صبحت دمعتنا وسادتنا و كده حاول اعرف لينا خلاص..



شال النوار ظلل بيتنا..من بهجة وعدك وما جيتنا

وفضلنا وحاتك منتظرين.. شوف وين روحتنا

و وين وديتنــا شوف وين وين...........















**********

الموعد

**********



أنوم الليلة ما بقدر أساهر يا منام أقدر

أشوفك . . بكرة فى الموعد

تصور . . روعة المشهد

أنوم الليل . . أنا لا يمكن

أساهر و النجوم تشهد



وعدتك قبل كده مرات .

ولسه برؤيتك . . . بحلم

مشاكل الدنيا تجبرنى . .

أخالف وعدى و أتلوم

ولوتعرفنى تعرفنى كم

بتعب بعيد عنك . . . . وأتألم

أضيع أتمنى . . . لو أقدر

وأقول . . ياريتنى اتعشم

أشوفك بكرة فى الموعد



أطاوعك يا ارداة الحب. .

وأسلم ليك ما عندى

أفضى ظروفى . . وأتفرغ

وأبادر بكرة فى و عدى

ويا يوم بكرة ما تسرع

تخفف لى نار وجدى

حنانك شوفنى مستنى

معاى أشواقى ما وحدى



أشووفك بكرة فى الموعد

أمانة الصبر ما طيب

مصير مكتوب . .

وكان لازم نحب

نعشق . . . ونجرب نلاقي السهد

وداعا يا ظلام الهم

على أبوابنا ما تعتب

ومرحب يا صباح الحب

تعال ما تبتعد . . . قرب



















لقاء وعهد

**********

لإسحق الحلنقي

**********



وحياة إبتسامتك ياحبيبى وحياة عينيك

قلبى حاذرك ومن زمان سائل عليــك

كل لمسه فى خيالى عن جمالك هى فيك

قبل ما أشوفك كنت فاكر الريد مستحيل

كنت هايم فى طريق خالي طويل

ليلى دون الناس كله آهات وكله ويل

تشهد الأيام ويشهد الليل والنحيب

قلبي عاشق ودربي خالي من حبيب

لكن يا ... حبيبي

من يوم ماشفتك قلبي للدنيا إبتسم

أشرقت دنياي وفارق دربي هم

رحت ألقاك في منامي أو بيك أحلم

في إنتظارك

ياحبيى رايح أرعاك بى حنانى

القى فى قربك سعادتى وأنسى

تعذيبى وهوانى يبغرو العشاق

من هوانا فرحة الريد والأمانى

ياحبيبى عشت لي وأنا عشت ليك

هاك عهدى ياحبيبي وهات أيديك

وحياة غرامى وحبي ليك أهدى

عمرىوروحي ليك .......





















الجريدة

**********

لفضل الله محمد

**********

سارحة مالِك يا حبيبة

ساهية وأفكارك بعيدة

بقرأ في عيونك حياتي

وإنت مشغولة بجريدة

بتقرئي في إيه كلّميني

ياسلام مهتمه عاملة

يعنى لازم تقرى هسه مقالْ

بحاله ، وقصّه كاملةْ

كم شهور مرّت علينا

وبينا فرقه شامله

العيون رويانة تبكي

والقلوب مشتاقة أمله

أي حاجة تمر بخاطركْ

قصة أو أخبار جديدةْ

عندي ليك خبر أهمْ

جايبو بي أشواق شديدةْ

أسمعي وطاوعيني مرّة

أيوة، ما تخليك عنيدهْ

عايز أقول لكْ

ليه أقول لكْ

ما بقولكْ

مش مخير

ولّة سيبك أقرئي أحسن في الجريدة

ساعة مرت ساعة وأكتر

والوقت روّح تأخر

زى عنادك عايز أعاند

لكن يظهر ما حا أقدر

أمرى لله كنت عايز أقول

بحبك يا وحيدة

بقرى في عيونك حياتي

وإنت مشغولة بجريدة.......



















خمسة سنين

**********

للدكتور عمر خالد

**********



خمسة سنين معاك يا زينة الأيام

يا نوّارة الحلوين مرّت حِلوة زي أنسام

وزي أحلام صبيّة نديّة، زي ياسمين

وزي لهفة بعيد مشتاق

يلاقي أحبّته الغايبن

خمسة سنين

ودرب الريد معاك أخضر

خمسة سنين، بريدك كل يوم أكتر

أحاول مرّة بس أنساك

عشان يا غالية أتذّكر

أجي وألقاك، ديمة معاي

وألقى هواك ملك دنياي

وفي أعماقي إتحكّّر

خمسة سنين...........



















إنت مهما تغيبى عنى

**********

للدكتور عمر خالد

**********



إنت مهما تغيبى عنى

أصله مابتفوتى منى

عايشه فيّ وساكنة جواى

في خواطري وفى مشاعري

في تسابيحى وغناي

زى فرح ماليه آخر

وشوق سنين لزول مسافر

راجى الزمن في يوم يجيبوا

لديارو ولحبيبو

والفريق يفرح يغنى

إنت مهما تغيبى عنى

أصلو مابتفوتى منى

فى عيونك شايلة أكوان

من براءة ومن محنه

وعزه تشرب من معزه

ومن تراثنا ومن أصلنا

و وعد غرقان فى نداه

وزحمة أطفال جوه جنه

وزول بيحلم بالعديلة

وفرحة الريد الطويلة

ناس تجيه وتغنى ليهو

ناس تبارك وناس تهنئ

إنت مهما تغيبى عنى

أصله مابتفوتى منى

وتبقى ياحلم الأماسى

شمعه ضاوية فى كل دار

وزهره في كل المواسم

كل يوم بزيد نضار

تهفو ليك الأمنيات

وتزهو بيك الأمسيات

وبيك تفرح وليك تغنى

إنت مهما تغيبي عنى

أصله مابتفوتى منى.......

















أربعه سنين

**********

فضل الله محمد فضل الله

**********





أربعه سنين عاشوا هم الحب

الليلة عيد ميلادهم ياقلب

وجدنا الحار زينة الدار

إبننا البار إبننا الحب

صونه يارب

أربعه سنين تجربه وزاد

مهرجانات حب وأعياد

إشتياقات قلبى رياد

إنفعالات ليها أبعاد

أربعه سنين عاشوا هم الحب

الليلة عيد ميلادهم ياقلب

طفلنا الحب طفل من نار

طفلي بيعيش أغرب أطوار

يضحك ألحان ويبكى أشعار

ييأمر الناس يمشو

مشوار أربعه سنين

أربعه سنين عاشوا هم الحب

الليلة عيد ميلادهم ياقلب

أربعه سنين..........



























غربه وشوق

**********

إسحق الحلنقى

**********





جيناكم ياحبايبنا بعد غربه وشوق

نغالب فيهو ويغالبنا

ونكتم آهة تظهر آهة تتعبنا

حنين لشوفة الغاليين مذوبنا

بعد غربه وشوق

هناك غربتنا ما هنتنا ياحلوين

هناك الهم بدل واحد يبين همين

ومهما قلوبنا تتأوه سنين وسنين

مصيرو الحى يلاقى حبايبه لو صادقين

سماع أهلاً من الأحباب شروق آمال

ووصف البهجة بالكلمات محال يتقال محال

حلاوة العودة غنيناها فى موال

تحكى عن الولف وأصله الولف كتال...........



























**********

جانا الخبر

**********





جانا الخبر شايله النسيم

في الليل يوشوش في الخمائل

هش الزهر بكت الورود

وسالت مشاعر الناس جداول

رجع البلد

بعد السنين المرة

يادوب العيون سهرن هجد

ياحليله ما رجع البلد

وعيونا ما سهرن هجد

في عيونه شوق أنهد

لحبه للناس للوطن

ماغيرت ريدته السنين

ومابدل إحساسه الزمن

وشفنا المشاعر الحلوة

في ساحاتنا بالآمال مشن

إنت ما نسمه في الهجير

إنت ما راحة ضمير

إنت ما بهجة مشاعر

إنت ما رحلة عبير

إنت ماياك الأمير

كيف نسيبك تمشى تانى

و إنت نورت البلد

العذاب فارق طريقنا

والعيون سهرن هجد.........

















**********

حاسدين غرامنا

**********





ياحاسدين غرامنا وياقاصدين خصامنا

شوفوا غيرى وغير حبيبي

يا دايرين تقولوا وماقادرين تقولوا

إيه عايزين تقولوا في وفى حبيبي

قولوا وقولوا قالوا مهما تقولوا قالوا

مارا يحين تنالوا منى ومن حبيبي

ديل قلبين ضماهم غرام

ديل إتنين دنياهم سلام

محال يحصل خصام

بيني وبين حبيبي

عهدي فيه وعهدو في

ريدي ليه وريدو لي

أوصف فيه ويوصف في

نصبر كمان نصبر شوية

نشيل أملنا نقابل أهلنا

يقولوا أهلاً خلاص قبلنا

يتم منانا يفرح أملنا

ونعيش برانا نعيش في جنه

لا يقولوا قالوا لا يقولوا قلنا...........

















كلام للحلوة

**********

هاشم صديق

**********





لما شُفتِك

ليلِى ضَّو وبَقَّ نور

ونرجس الجنة المفرهد

رفّ بنحَات عطور

وغنَّى فارسِك

خَتَّ صورتِك في الإطار

في الليالي نَجِم بيلألئ

ونسمه في وهج النهار

وقال في وَصفِك لما بنت

أحلى مِنِّك . برضُو إنتِ

وما في غيرِك زول معانا

حتى كان يا السمحة غِبت

ومَرّه جَالَن ألف خَاطِر

بعيون عقلي المسَاهر

فجأة عينيكِ الحبيبة

!قالوا سارح وين مِسَافِر؟

عِشتَ قولِن شيلاً وصَفقَه

وقُلت بس يا ريتنى أبقى

همسه في حُلم الأميرة

أو سَبَايب في الضفيرة

أو عِقيد في تِبرِ جيدها

أو قليب في راحة أيدها

يا زمان أسمعني وأكتب:

ألبريدها ، ريدا سيدي

وريدي سِيدَها

الزمان لو حتى بالغ

ما أظِن في يوم يعيدها.

يا حلاوتك

مره همسه ..

ومره نَسمَه ومره هَلّت نَجْمه غابت

ومره صَحْوَة غمزه نامت

ومره ضحكه تَرَضِّى شوقنا

ومره كلمه تضِّوي فوقنا

ولمّا نسرح فيكِ قَادلَة

زى ملاكيه علينا نازله

بَس نغنى:

يا حلاتكُم يا أهَلنَا

يا مصابيحنا ونجومنا

الضّاويَة في واحات زَمَنَّا

يا أهلنا........























تقولين الهوا

**********

لنزار قباني

**********





تقولين الهوا شيء جميل

الم تقرأ قديما شعر قيس

أجئت ألآن تصطنعين حبا

ذبحت به الفؤاد ولم تحس

أقاسية المشاعر غادريني

فما أنا عبد سيدة وكأس

لقد أخطأت حينما ظننت أني

أبيع رجولتي وأضيع نفسي

فأكبر من جمالك كبريائي

وأعظم من لظي شفتيك بأسي

لا فما أنا عبد سيدة وكأس

أتافة الوصال إلي ردي

لهيب عواطفي وجحيم حسي

لقد دمرت أيامي وعمري

فجفت دمعتي وأنبح حسي

أعيديني إلى أصلي جميلاً

فمهما كنت .. أجمل منك نفسي

لا .. فما أنا عبد سيدة وكأس............



























همس الشوق

**********

كلمات هاشم صديق

**********





يا ريتنى لو أقدر أقول

فيكِ الكلام الما أنكتب

واجلي المقاطع بالذهب

وأفرد صباح حُسنِك وشاح

يمسح عذاب عمري المسطرّ باللهب

بريدك

كلمه كان رفّت

يِهش ثغر النجوم و يسطعَ

ولما ينادى همس الشوق

يقيف كل الزمن ويسمع

عيونك ديل عيون أهلي

الحُنان زى نغمة في مقطع

وطُهرِك تاج جواهرهُ ألعزه

وإنت ألعزه ليك تركع

بحبِك يا صباح العيد

ويا فَرَح العريس السار

وأحِسّك في سما الأزمان

شمس بِتضَوى للمشوار

زمان يا حلوه ساقني الليل

وغِبْتَ وضعتَ في الأسفار

ولّما لقيت عيونك ديل

بديت أعشق عيون الدار

وَحَياة ريدي اللي شاف طيفِك

كثير قُباّل يلاقى ويشوف

جراح الماضي بيك نامت

وغابت كلُ رعشة خوف

بحبك ومافى غيرك نور

يهِل ويغمرُ طريق الشوق

وما في بَلَاك نور بِسْطَع

ولا فرحاً يسوقني يطوف..........























طائر الأحلام

**********

كلمات السر كُنّه

**********





يا مُنىً ..أهدي إلى المهجة أنفاساً وعُمرا

أهرقت دُنياك في دُنيَايَ أنغاماًً وسحراً

وتَذوَقتُ غراماً منكَ مَشبوباً ومُرا

يا هزاراً رائعُ الطلعة فَتاناً أغَرا

فَجرَ الألحانَ في قلبي إعلاناً وسرا

يا صَباحاً فَتقَ الآمال في الخاطر زهرا

ونَدى يُدفقُ أشواقاً ويغرورق عطرا

يا جناحاً طَوَقَ الأضلاعَ أفراحاً وبشرا

يا شراعاً أوصَلَ الزورق للشاطئ فجرا

ما الذي أهديه إلا ذوب إضلاعي شعرا

وأفتتاني وإندفاق أغاريديَ خَمرا

قد تنَعَمتُ عَطاءأً منك ثَراراً روياً

وحُنُواً هَدهَدَ الآلام رَفرَافاً نَديا

يا عيوناً كاليَنَابيع شُرُوداً وابتساماً

نَبعت في حَقل أيامي رَبيعاً وسَلاما

وقواماً كالأهازيج تَثَنى وتَسَاما

وانسياب الشَعر مَرأى بيدر صَلى وناما

يا عُيوناً كالغناء العَذب في دفيء العَشية

يا عُيوناً مثل صُبح العيد في الدار الحفية

كانت الفرحة في قُربك أعراساً من الضوء

وكان الشعرُ طفلاً غَسقيا

فتَبنَاهُ المُغني

وحَباهُ من بريق النَغَم الوَهاج كالبلور زِياً

ورعَى الأزهارَ في كلتا يَدَيه

ثُم ضَاع الطفلُ يا رَباهُ من بينَ يَدَيا

فَتَلَهَفتُ عليه

ومضَى الزَورَقُ بالملاح جيلا

كان الإعصَارُ والبحرُ عَتيا

هكذا دارت بنا الأيامُ

يا طائرَ أحلامي الزَقَاليل

ويا طَلق المُحَيا...........























حروف إسمِك

**********

لهاشم صديق

**********





حروف إسمِك

جمال الفال

وراحة البال

وهجعة زول بعد ترحال

وتنّية حلوة للشبال

ودنيتنا ومشاويرنا

وغنواتنا اليما بتِنقال

حروف إسمِك

نجوم ركّت على الياسمين

فرح في عين جمالها حزين

أساور فى إيدين طفلة

بتحفظ في كتاب الدين

زَفَافَ عاشقين بعد فرقه

وسط باقات دُعَا الطيبين

حروف إسمِك

عقد منضوم بخيط النور

وطلة وردة من السور

ونغمة تنادى من طمبور

وشُعلة فرحة فى الوادي

تَشِع جذلانة ليها شهور

حروف إسمِك

وَكِت أشتاق وأرحل ليك

وأسرح في عسل عينيك

بِتَحضنّىِ......

قَبُل ألمسَ حرير إيديك

تأرجِحنى..وتَفَرحنى..وتخلينى

أدُق صدرى

وأقيف وسط البلد وأهتف

بريدك يا صَباح عمري..........























**********

هواي تستبعدو

**********





تقول هواي تستبعدو

وتضحي بيهو وتفقدو

ليه كلام زعل إنت مابتقصدو

البينى بينك شوق عمر

لانام لا مده إنحسر

البينى بينك

لا الشعر قادر يقولو ولا الوتر

وتقول هواي تستبعدو!

وضحى بيهو وتفقدو

ليه كلام زعل إنت مابتقصدو

ماقلت ليك أنا

من قبل ده ساعد عواطفك ساعده

خليها تهداء وعوده

تزعل شوية شوية مش كده

وتقول هواي تستبعدو!.........



















عويناتك

**********

لدكتور مبارك بشير

**********





أقول ليها عويناتك ترع لولي وبحار ياقوت

مناحات ريد حزاينية بغازل فيها مأساتي

وفي شرف العبور ليها بموت وأكسر شراعاتي

تقول لي غناك حزين غناي حزين

وأنا الواهب قصائدي الباكية للفرحة

وأنا البديها شان ريدي وصباي طرحة

قول ليها عويناتك زي سواد قدري

مكحله عمري من بدري

لو بقدر أسافر في بريق لحظك وما أرجع

تقول لي خايفاك بكرة تتوجع وأتوجع

أقول ليها عويناتك ديار وعدي

مسورة بي جدار صمتك

عذابي معاك بريدك قبل ما أعرفك

ولو بقدر أشيل من الزمن وقتي

بموت في لحظه وأوهب ليك عقاب عمري

عويناتك..........





















**********

إشتياق

**********





من شوفتو طولنا

نهواهو مازلنا ..

نهواهو رغم الجور رغم الصدود عنا

يا قريب مني بعيد متى دهري بيك يجود

أراك وأبقى سعيد وظلامي يبقى نور

بي قربك أتهنى ..

مشتاق ونار الشوق كيف ليها اقدر أطيق

كيف من همومي أفيق مدام وصالي عسير

وبعيد عن الجنة

الليهو ديمة أحن

ليه بوصالو يضن !

النائي ليهو زمن أتمنى طيفو يدوم ويدوم

أتمنى وأتمنى يدوم طيفو.........











ذات الضفاير

**********

للفاضل أبوقدير

**********



الـشـفـنـا مــنــه كـتـيـر

وكــــم قـاسـيـنا يـاهـلـنا

وجــهــه الــبـدر فــتـان

فـــي ضـفـايـره سـافـرنـا

فــي حـديـثة أحلى نـغـم

أنشودة تــتــغـنـى

مـــــا أروع الـبـسـمـات

مــــن روعــتـن تـهـنـا

لادن فـــريــع الـــبــان

كــــل خــطــوة بـتـنـى

بـسـهـام عــيـون حـلـوين

نــشــابــه جــارحــنـا

عـصـفـور جــنـىّ الـحـور

بــعــيـونـه رحــلــنــا

الــفــى الــفـؤاد ذكـــراه

فــــى ريـــده سـرحـنـا

خــلانــا مـــا عـارفـيـن

ويـــن نـحـن ويــن كـنـا

آمــالــنــا نــهــديـهـا

لــلــحـلـوة تــتــهـنـى........























بتتعلم من الأيام

**********

لفضل الله محمد

**********





بتتعلم من الأيام مصيرك بكره تتعلم

وتعرف كيف يكون الريد وليه الناس

ليه ليه بتتــــالـــم

متين عرف الهوى قلبك

متين فاضت بآهاته - متين سهر

عيونك ليل طويلة طويلة ساعاته

وحاتك لسه مابتقدر تقاسم قلبى دقاته

ومصيرك بكرة تتعلم

وتعرف كيف يكون الريد وليه الناس بتتألم

أقابلك وكلى حنية وأخاف من نظرتك لييه

وأخاف شوق العمر كله يفاجئك يوم في عينيه

وراء البسمات كتمت دموع وبكيت من غير تحس بي

ومصيرك بكرة تتعلم

وتعرف كيف يكون الريد وليه الناس بتتألم

وبكره بكره الريد الريد بدون مواعيد يزورك

يا حياة عمرى وتقول ياريتنى لو حبيت

زمان من بدرى

تعال تعال تعال فرح ليالينا وتعال قبل

السنين تجــــرى

ومصيرك بكرة تتعلم

وتعرف كيف يكون الريد وليه الناس بتتألم وتتعلم........

























**********

ذاد الشجون

**********





ماهو باين فى العيون وين حنهرب منو وين

الهوى البعث الليالى العامرة بى ذاد الشجون

يفتح قلوبنا ديار محبه ديار محبه ديار حياه للعائدين

مابنقاوم وكيف حنقدر وين نهرب منو وين

ما أفتكرت الحظ يساعد عمرى يورق من جديد

من بعد فرقتنا ديك مين تاني بيفتكرك تعود

كنت بحتاج ليك بشده وأنت بعيد

مافى عيشه بلاك بتبقى ومافى نشوه ومافى ريد

ده الهوى الجنبك عرفتو عاطفه ملتهبه وجنون

ويـــن حنـــهـرب مـــنو ويــن

آه ادعينا وقلنا تانى ماحانشتاق فى عمرنا

وقبل ماتمر ليله واحده بحرارة الشوق غمرنا

كم كم لهينا وقلنا يمكن ندفن الحب في سهرنا

الحياة صعبة علينا وبى اثر فقدك شعرنا

شفت كيف حبك حياتنا أنت يالحبك حياتنا

وكــيف بدون حــبك نكـون

وين حــنهــرب منو ويــــن

شفت كيف حبك بيعمل يشغل الوجدان ويعذب

آه وبرضو بتقول عنى خادعك وأنى بتلاعب وبكذب

ليك حق دنياك خاليه لابتشيل هم ولابتتعب

كنت تتعلم تجامل لو فؤادك مره جرب

انو مايدق دقه واحده إلا ويتفجر حنين

يفتح قلوبنا ديار محبه ديار حياه للعائدين...........

















الحــــــــب والظروف

**********

لفضل الله محمد

**********





قلنا ما ممكن تسافر

نحن حالفين بالمشاعر

لسه ما صدقنا انك بجلالك جيتنا زائر

السفر ملحوق ولازم إنت تجبر بالخواطر

* * * * * *

الغريبة الساعة جنبك تبدو أقصر من دقيقة

والدقيقة وإنت ما في مرة ما بنقدر نطيقها

دنيا بقربك يفرهد كل طائر يحيا فوقها

وجنة من بعدك بيذبل كل مخضر فيها ناضر

* * * * * *

لو تسافر دون رضانا بنشقى نحن الدهر كله

ما بنضوق فى الدنيا متعة وكل زول غيرك نمله

أقل حاجة تخلي سفرك حتى لو إسبوع أقله

وإنت عارف نحن بعدك للصباح دايما نساهر

* * * * * *

لا لا ما بنقبل نسيبك تمشي للوحدة وتعاني

برضو ما بنقدر نقاوم شوقنا من بعدك ثواني

وما بنغنى وراك كلمة وما بنشوف البهجة تاني

غايتو لو شفقان علينا ما أظنك في يوم تسافر

وقلنا ماممكن تسافر ماممكن.......

















**********

يا معاين من الشباك

**********





يا معاين من الشباك

يا أحلى زول شفناك

أرحم قلوبنا معاك

وشاركنا نحن هواك

يا كامل الأوصاف

يا الكلك جمال وعفاف

عايزين نقول بنخاف

تهرب وما تنشاف

ناوين نزور والديك

نطلب ياحميل إيدك

نوعد بالعمر نفديك

لو العمر يرضيك

يا غالى ليك هوينا

الشباك يشهد لينا

كم مرة رحنا وجينا

لو بالعيون قول لينا

إنك يا جميل حابينا















بدور القلعة

**********

لأبو صلاح

**********





السيوف ألحاظك تشهرا

للفؤاد المن بدرى انهرا

أخفى ريدتك مرة و اجهرا

نار غرامك ربك يقهرا



يا بدور القلعة و جوهرا



صيدة غيرك مين الجسرا

تستلم افكارنا و تأثرا

حال محاسنك مين الفسرا

يالثريا الفوق أهل الثرى



يا بدور القلعة و جوهرا



الصدير أعطافك فترا

النهيد باع فينا و اشترى

الشعر أقدامك سترا

لقطيبو قلوبنا البعترا



يا بدور القلعة و جوهرا



عالى صدرك لى خصرك برى

فيه جوز رمان جلى البرا

الخطيبة و ردفك منبرا



يا بدور القلعة و جوهرا



جلسة يا أبو الحاج أتذكرا

و رنة الصفارة أتفكرا

وهبة بى مزيقتو إتحكرا

كم طرب أفكارنا و أسكرا



يا بدور القلعة و جوهرا



العيون النوركن بجهرا

غير جمالكن مين السهرا



يا بدور القلعة و جوهرا















مراكب الشوق

**********

لمحمد الحسن

**********





شايلك معاي و ادفق بطيبة العيون

وكتين أسير مشوار براي

و اتاتي زي رمشاً حزين بكى الصباح

وأتمسى بحزن المساء

وابقي الوحيد

زي بلبل فقد الجناح هاجر جناه على الصقيع كاس لبوادي مِشمِسة

وارحل شواطئ الغربة مغلوب بالرياح وانحت حروف فوق الصخور و اتحسسا

وابعث غناي مع كل آهه و كل زفرة وكل ضحكة مونسة

شان تمشي لعيونك تعيش وتونسا



وأتخيلك وكتين أشوف أُماً تهبب لعروس وقت الزفاف و ترقصا

وارحل بعيد فوق شعرها زي مركب نشوان مشى فوق موج و شلالات

و آخر المطاف فوق شط حنان مهجور زمن راح وأتنسى

وزي ريس الساري الغريب غالَب ليالي الشوق على الساري إتكى

ورش الدموع برعشة الغيم البكى

ودس الأنين فتق جراحات الحنين في الغربة باسة و وَشوَشا

وأتذكرك وكتين أشوف لارنجة تتحدى الرياح عِز السموم صدر الشتاء

وتمد غلالها على الهجير تفرح ....تفرِح الرياح و توسوِسا

















ومن الأناشيد الوطنية

**********

مساجينك

**********





مساجينك

مساجينك

مساجينك

تغرد في زنازينك

عصافيراً مجرّحه بى سكاكينك

نغنى..

ونحن في أسرك

وترجف..

وأنت في قصرك

سماواتك دخاخينك

مساجينك

مساجينك

مساجينك

يرغمك نحن مازلنا

بتكبر بى زلازلنا

بنعشق في سلاسلنا

وبنسخر

من زنازينك

مساجينك

مساجينك

مساجينك

حكايات الهوى الأول..

بنحكيها

بدايات الغُنا الطول.. نغنيها

حقيقه وليس تتأول

!حتخجل من عناوينك

مساجينك

مساجينك

مساجينك

للسودان عواطفنا

وبالسودان مواقفنا

ولّما تهب عواصفنا

ما حيله قوانينك؟

مساجينك

مساجينك

مساجينك















الملحمة - قصة ثورة

**********

لهاشم صديق

**********







لما الليل الظالم طوّل

وفجر النور من عينّا إتحول

قلنا نعيد الماضي الأول

ماضي جدودنا الهَزَمُوا الباغي

وهدّوا قلاع الظلم الطاغي.



وفي ليله وكنا حُشود بِتصارع

عهد الظلم الشبَّ حواجز

شبَّ موانع

جانا هتاف من عِند الشارع

قسماً...قسماً

لن ننهار

طريق الثورة

هُدى الأحرار.

والشارع ثار

وغضب ألامه أتمدد نار

والكل يا وطني حشود ثوار

وهزمنا الليل

هزمنا الليل.

والنور في الآخر طل الدار

والعزة أتهادت للأحرار.



وطني أنحن سيوف أمجادك

ونحن مواكب تفدى تُرابك

ولِسّه الشارع بِشهَد لينا

في يوم الغضبة حصاد ماضينا

مشينا نَعَطّر حقل الثورة

بِدَم نَفْدِيها بلادنا الحرة

وكان أكتوبر فجر الغضبة

كسرنا قيود الماضي الصعبة

لما مشينا مواكب صَامده

تهدر- وتغلي ... وتهتف راعدة

الرصاص لن يفنينا.

الرصاص لن يفنينا



وسال الدم في أرض الوادي

فَدينا النور بالروح يا بلادي

وكانت صفحة حكاها العالم

وفجر أكتوبر طَلّ وسَالَم



كان في الجامعة موكب هادر

صمَّم يجلى الليل السّادر

وكان الليل السادر غادر

فجّر غدرو سموم دخان

ورُصاص من صوته صِحَا السودان

والشعب الثائر

صمّم هادر

يصرع ليلنا الداجي الطَّوَّل

وكان القرشى شهيدنا الأول

وما اتراجَعنا

حلفنا نقاوم ليلنا وسِرنَا

نذرنا الروح ومَسَكْنَا دَرِبنَا

للشمس النايرة قطعنا بحور

حلفنا نموت أو نلقى النور

وكان فى الخطوة بنلقى شهيد

بى دمه بِيِرسُم فجر العيد.

يا اكتوبر

أنِحْنا العِشنا ليالي زمان

في قيود ومظالم وويل وهوان

كان في صدورنا غضب بركان

وكنا بنقسم بالأوطان

نَسَطَّر اسمك يا سودان



بدمانا السّالت راويه الساحة.

وحلفنا نسير ما نْضوق الراحة

شهرنا سيوف عِصيانّا المدني

وكانت وحدة صف يا وطني

إيد فى ايد حلفنا نقاوم

ما بنِترْاَجع وما بِنسَاوم

بينّا وبينك ثار يا ظالم



خُطانا تسير في درب النصر

هتافنا يدَوّى يهز القصر

كسرنا حواجز ..أزِلنا موانع

صفنا واحد

عامل.وطالب..زارع وصانع

وهزمنا الليل

هزمنا الليل

والنور في الآخر طل الدار

والعِّزة إتهادت للأحرار

يا ساحة القصر..يا حقل النور

ويا واحة بتَحَضن روح نَصّار

روينا ورودك دم ثوار

وشتَلنا فضاك هتاف أحرار

خَطّينا ترابك أحرف نايره

بتحكى سطور أيامنا الثائرة

وشلنا الشهداء مشينا ونهتف

وجرح النار في قلوبنا بينزف

سَجّينا الشُهدا وجينا نقاوم

ما بنِتراجع وما بِنساوم



وفجأة ونحن صفوف بتصمم

زغرد فجر الثورة الحالم

والنور في الآخر طل الدار

والعزة أتهادت للأحرار

قسماً..قسماً يا أكتوبر

نحمى شعارك

ونجنى ثمارك

ونرفع راية الثورة الغالية

عاليه ترفرف فوق السارية

عليها شعار الثورة الأكبر

رسُمه النادر زاهي واخضر

ولِسّه ينقسم يا أكتوبر

لما يطل في فجرنا ظالم

نحمى شعار الثورة نقاوم

نبقى صفوف تمتدّ وتهتف

لما يعود الفجر الحالم يا أكتوبر















**********

نرجسة

**********





من طيف ملامح ياتو شي

إنت الجمال أداك خواصه وكل شي...



يا أسمى آيات الكمال.. و الرقة و الذوق و الفهم

يا مكمن السحر الحلال.. و الضحكة و الحس و النغم

يا فكرة تجتاح الخيال..تملاه بالخير و العشم

يا نشوة الفرح المحال..تعرف قلوبنا معاه هم...



يا نرجسة....

يا روعة الليل البهيج.. نام في العيون الناعسة

يا دهشة الشوق المهيب.. نكتم مشاعر و نحبسه

يا كلمة بين شفتين حنان..للمولى خشية بنهمسة

يرعاك من شر العيون..يحفظ محاسنك و يحرسه...





















ود مدني

**********

لخليل فرح

**********





مالو أعياه النضال بدني

وروحي ليه مشتهية ود مدني

ليت حظي يسمح ويسعدني

طوفة فد يوم في ربوع مدني

كنت أزور ابويا ود مدني

وأشكي ليه الحضري والمدني

آه..على حشاشتي ودجني

وحنيني ولوعتي وشجني

أه.. دار أبويا ومتعتي وعجني

يا سعادتي وثروتي ومجني...















وهذا جزء من أغنية

يا جميل يا رائع

**********

لصلاح حاج سعيد

**********





مشتاق ليك يا جميل يا رائع

و لاحلام الزمن الضائع

منى و عامل فينى مواجع...



مشتاق ليك و معاى يوماتى

مالى على فى الدنيا حياتى

عائش جوة فؤادى معزة

زى ما اكون غرقان فى ذاتى

شادد عصب الحس السادس

وراجى رياح العودة و اهاتى

نرجع لايامنا الحلوة

و الافراح بيك تملأ حياتى

مشتاق ليك يا جميل يا رائع...

الرجوع الى أعلى الصفحة اذهب الى الأسفل
 
كلمات أغاني الأستاذ الموسيقار ( محمّد الأمين )
الرجوع الى أعلى الصفحة 
صفحة 1 من اصل 1
 مواضيع مماثلة
-
» كلمات أغاني الفنان ( كمال ترباس )
» كلمات أغاني الفنان ( محمد احمد عوض )
» أغنيات الأستاذ محمد الامين
» كلمات ابو صلاح
» كلمات اغانى ذيدان ابراهيم

صلاحيات هذا المنتدى:لاتستطيع الرد على المواضيع في هذا المنتدى
منتديات أبناء أم سنيبرة :: الفئة الأولى :: منتدى الموسيقى-
انتقل الى: